首先，呢間野叫「好吃嘴」，系waterford plaza
必需要更正既系，剛才個牛肉麵除左無落花椒粉之外，實在系無野可以挑剔既，同全盛時期既聯記比，相似度有95%，所以應該昇多個grade, 將佢評級為EZ-8甚至系試作型高逹級既。而且佢只系賣$10.5一碗咋，考慮到佢要控制成本既問題，呢5%實在可以原諒。
然後再試埋個口水鷄，水準都大致相若，個紅油底完全合格，當然，落料可以再重手d，同樣都系因為無花椒粉，差左小小。但系，請記住，呢度系澳洲啊，可以食到呢個水準既川菜，算系噤既啦。
試作型皮蛋豆腐
然後呢，隻口水鷄借D意食剩小小，然後攞個外賣盒打包------為既當然唔系d鷄啦，為左個紅油底啊。跟手即刻衝去超市，買左盒豆腐，掃左幾隻皮蛋，番屋企自己整皮蛋豆腐啦梗系~
話說當年聯記眾多川菜之中，最另我神魂顛倒既，就系佢地既皮蛋豆腐。將正直同老胡引落賊船，另到班仆街沉淪辣海、永不超生既，同樣系呢隻皮蛋豆腐。
講落真系神奇，豆腐同皮蛋，原本兩樣都系極其平常既家常食物，遇上左紅油之後，竟然搖身一變成為人間美味: 豆腐原本系清淡無味既，但同紅油一撞之後竟然系陣陣清甜、入口回甘。更可怕既系果隻皮蛋，同平時我地食開黑色既用鴨蛋制成既皮蛋唔同。聯記用既系一種金黃色既皮蛋，估計系用鷄蛋做既，具體出處依然有待查考。色澤金黃澄亮，且無普通皮蛋既腥味，入口清香甘甜，滿口膏腴。真系一試難忘，再試頃心。我食左十幾年川菜，就得聯記一家有用過呢種黃金皮蛋，只此一家，別無分店。
真系往事只能回味啊.....
似乎西菜入邊，牛撞羊既玩法比我想像中更普遍，繼上次飛沙士宴會部既牛撞羊勒骨之後，又發現market & co即炆羊小腿同樣都系用beef stock，即系牛骨湯黎炆既，效果相當唔錯，比起我為左去羊蘇味而用既紅酒炆法更惹味，當然，亦都更大工程啦：單系果煲牛骨湯都要熬成日。話說守水塘兩個月，就十足十韋小寶做御膳房總管噤，盡食廚房所有，真系食到有d厭，唯獨呢個羊腿我會一試再試。理論上，今晚應該系我最後一晚守水塘，臨別秋波，點可以唔食多兩隻呢？正所謂：悄悄的我走了，正如我悄悄的來。我揮一揮衣袖，不帶走一條羊腿～-------黃邪《再別水塘》
---------------------------------
再別水塘
黃邪
輕輕的我走了，
正如我輕輕的來。
我輕輕的招手，
作別最愛的水塘。
那安格斯的牛扒，
是午夜中的天使。
濃濃的肉汁，
在我的口里蕩漾。
紅燒的豬腩肉，
油油的在碟頭招搖。
在水塘的廚房里，
我甘心做一條飯桶。
那西班牙的風乾牛肉，
不是清泉，是天上虹。
意大利的芝士，
沉澱著美味的夢。
為食？點一打生蠔，
向熏腥更深處探索。
滿載一肚魚蝦，
在煙火燦爛處放歌。
但我不能放歌，
悄悄是別離的笙簫。
廚房為我沉默，
沉默是今晚的水塘！
悄悄的我走了，
正如我悄悄的來。
我揮一揮衣袖，
不帶走一條羊腿～
而家逛商場，除左睇下衫之外，更多既時間系用黎睇廚具。就好似一個貪靚既女人總有一套胭脂水粉眉筆唇膏系個梳妝櫃入邊一樣。一個中意煮食既人，都總愛收集各式既烹飪工具。如果我有自己既廚房，我一定會掃曬佢地返去。的確，我一直夢想住有自己既廚房。然後每逄徦日，我就可以邀請三五知己黎我家中作客。呢個應該系一個開放式既廚房，佢地要黎睇我表演，為我喝彩，品嚐我試制既各式旁門左味。當然，更重要既戲肉，系講故事，講食既故事，幾時食，食咩野，邊度食，點樣食，同咩人食，發生左咩事，都系果句，味道連帶住記憶。相傳當年清代既蒲松齡就系每日煮一大煲綠豆湯，然後系路邊驛站免費招待途人。作為回報，途人只要向佢講返一個故事。就靠噤樣將收集返黎既故事整理結集成書，作成左日後膾炙人口既《聊齋誌異》。同樣道理，如果每位我邀請既賓客都可以為我講返個故事，話唔定有朝一日，我都可以寫返部《邪齋誌食》架~
話說系我到左澳洲之後，先發覺西人眼中既「西」式糕點同我地眼中既「西」式糕點，系味道同風格上系幾唔同下架，可以話我地香港人平日系西餅店買到既糕點，不論系果tart, cheese cake,定系雞尾包、腸仔包之類，口味同風格上都己經系本土化左，有D甚至系本土獨有，例如系蛋tart，鬼佬根本唔知乜野黎。口味上豐富多變，質感精緻細膩，所謂食不厭細，膾不厭精。而且配合東方人既口味，唔會太甜，注重平衡感。相比之下呢，澳洲人日常最中意食用既甜點口味就濃烈得多，而且好強調單一個性，例如chocolate mud cake, 朱古力味極濃，而且甜到嚇親人，質感上偏粗「鞋」。如果用女人作比喻既話，我會形容口味己經fusion 左既香港西式甜點為小家碧玉，一如傳統既東方女性形象，溫柔、婉約、細膩。而符合西人認知既西式糕點呢，就系一條豪放女，個性強烈、鮮明，豪邁而富有激情，有人會好中意，亦有人會好討厭。
而今日我要試既呢個honey cake，好明顯系由西人糕點師所制，但味道同質感上，竟然系我上面形容既小家碧玉型既，實在系頗有幾分驚喜架。事緣系早幾日系朋友Stanley個facebook度睇到呢款蛋糕，睇佢評價似乎相當唔錯，見反正今日得閒無事，一於殺入去試下。間鋪系fremantle market, 一個唔算起眼既鋪仔，要花小小時間先搵到。價錢偏貴，大概系一部PSP噤大size既一方賣成AUD20蚊，即系港紙百四蚊，包裝算得體。打開包裝呢，目測距離下，狀似木糠蛋，鋪滿左核桃碎，並且以千層糕既形式一層蛋糕夾住一層由蜂蜜同似榛子醬之類既物體混合而成既糖醬。未入口己經聞到淡淡既清香。而味道呢，甜味好適中，蜂蜜糖醬好滑，質感小似黃蓮蓉，核桃打得好碎，所以能夠帶出層次之餘又不至粗「鞋」，可以講各種元素都拿涅得準確，平衡感處理得好好，細緻之處顯出心機。初入口略顯平淡，但之後餘香陣陣，會越食越想食。
如果以五粒星為最高既話，我會比四粒星佢，主要系一方面太遠，旺角入東涌既路程，而且fremantle market 只系徦日先開，唔系日日有。另外價錢都偏貴，會稍稍失分，不過當然，好野系要用心制作既，花既系心機同時間，比多少少錢去支持下系應該既。總之，個人認為要山長水遠特登入去試就大可不必，但入到去fremantle 玩既，唔去買返份返屋企做甜品，又實在可惜既。就系噤，包膠完畢。
下午朋友Steve系facebook 提起市區新開左間麵店，以竹昇麵作招徠，立時按捺不住，要一試方休。竹昇麵系一種廣東特有既傳統麵食，多以鷄蛋或者鴨蛋制既全蛋麵，以竹竿碾壓，質感爽口彈牙，系雲吞麵最常用既麵底。所謂味道連帶著記憶，系我記憶深處，某幾段美味/美好既回憶，亦都同竹昇麵有關，因此每當聽聞某處有傳統竹昇麵雲雲，都會滿懷期待噤前往一試，希望重溫久違既味道。
呢家叫Noodle Forum，店面新淨。我點左碗牛碗麵，外加一碗雲吞，要試下師傳既基本功。麵好快上，份量細而精緻，同「細蓉」差唔多。入口一試，麵確系竹昇麵，爽口彈牙，只系味道頗為陌生，原來問題出自牛腩，佢並非傳統廣東炆牛腩。傳統既廣東炆牛腩應該系用鼓油、柱候醬、花椒、八角、黃糖黎炆既，但呢個牛腩味帶甘苦，系黑油既味道，而非柱候醬，無花椒八角，取而代之既系薑，同台式三杯鷄既汁底類近。一問之下，方知大廚為馬拉人，祖籍廣東，祖輩移居馬拉，上兩代均以制作竹昇麵為生，所以麵底確系竹昇麵，只系烹煮之法及醬汁己經馬拉化，即系馬拉風既牛腩麵。至於雲吞，湯底尚甜，奈何雲吞受新派港式雲吞影響，都系用海蝦，而非半肥瘦猪肉，徒有質感而欠味道，當然就唔會有猪油香。 撇開廣東正宗呢個偏見因素，大廚既功夫其實系相當札實既，整體味道中規中距，馬拉風既廣式麵，作為一種新體會，系值得一試既，但始終唔系我想搵既味道，所以多少有啲失望。
早兩日由一篇關於死囚最後晚餐既文章，引發我思考我臨死前既最後晚餐，大致可分為現實版同夢幻版。現實版指既系現實條件許可下可以做到既，夢幻版則深知現實己不可行，純粹系聊勝於無，畫餅充飢而矣。噤系啲乜野黎既呢﹖現實版且按下不表，先講下夢幻版﹕我想食到既，系童年系故鄉嚐過，至今己經失傳既古法雲吞麵，麵系竹昇麵，湯底應該系用大地魚、河蝦等熬制，份外鮮甜，加猪油渣，油香滿溢，雲吞餡則要用半肥瘦猪肉，或會混入少量河蝦蓉。另外，仲有澆上種某種自家配方既辣椒鼔油既布拉腸粉，同某道更為漂渺，所用既醬汁炒法同今日完全唔同既神秘炒牛河，只知佢系用猪油炒。
話說我既祖籍系廣州鄰近某山卡啦小鎮，因為地方偏狹，工業化同現代化既速度遠比鄰近大城市為慢，因此八九十年代既所謂改革開放大潮之下，反而能夠獨善其身，傳統既飲食業系當時仍未受到衝擊，因此荒村野店，簡單既一道雲吞麵、一道腸粉，一道炒牛河，都能夠呈現出最地道最傳統既廣東風味，同早己工業化同西化左既港式新派粵菜形成鮮明對比。因此，盡管當時只系慒懂小童既我亦都留下深刻印象。更何況，記憶連帶住味道，美味既背後，仲有眾多美好既回憶。果個系祖父兆池公依然在世既時代，亦即系我仲系二世祖、金叵籮既日子。兆池公一世英雄，系鄉下游水落香港，白手興家，創下豐盛既家業，系典型既獅子山下既故事。為人又仗義疏財，樂善好施，因此不但本家，同族鄉里均其恩惠，系故鄉可謂德高望重，每次返鄉，全村全鎮有如過節。沾佢既光，我呢個四代單傳既二世祖、金叵籮，自然備受萬千寵愛，每次均在族中長老引領之下得以嚐鮮，口福自是不淺。
只系呢一切實在太美好，美好到我仲未意識得到，仲未仔細咀嚼過，就己頃刻間化為塵土。兆池公早逝，家業迅速頃頹，我呢隻二世祖，亦都變成地底泥，剩低落黎既就只有二十幾年既飄泊流離，以及對昔日味道既淡淡回憶，有如春夢。如今，所謂既現代化，工業化早己席卷全國，十億人民一條心，齊心合力向錢看，我既故鄉又岂能例外。工業化，對傳統飲食業既衝撃系災難性既，制程用料大幅簡化，原材料受污染、或以化學添加劑代替等等因素，對食味既影響都系致命既。傳統既配方早己失傳，即使得以保留，但因相關材料既缺失亦無復當年美味，果道雲吞麵，果道腸粉，果道炒牛河，亦都永成絶響，往事只能回味。正因為不可得，方顯得夢幻，所以作為我既夢幻的最後晚餐，實在再適合不過。若系死前得以一嚐，然後兩脚一伸，去見兆池公，話佢知，做孫既，雖然做唔出咩大成績，但噤多年黎，一直都系度努力，起碼無丟佢架啦。如此，岂不美哉.......
對於我地呢班食過頂峰時期聯記川菜既人黎講，乜野系正宗既川菜，早己系心中有數。然後，我地呢班友，又有一另外一個共同既特徵，就系毒撚~ 所以即使唔系高逹FANS，但對高逹既故事同歷史絶對唔會陌生。而聯記走向量產既歷史，同高逹變GM，即系量產化高逹，幾乎系同出一轍，因此高逹系統就順理成章噤成為一個我地圍內一講就明既評級系統啦~2005至2007年，聯記夫婦為左了解香港人對川菜既接受程度，不惜工本、不計辛勞噤，系佢地既家鄉四川買齊所有材料，一絲不苟噤制作出最地道、最足本既四川涼菜，就系為左認證一個佢地心目中既概念。 情形就好比高逹故事入邊，聯邦軍不惜工本，投入天文數字預算，制作出當時集尖端技術於一身既高逹，以驗證MS 技術概念一樣。 所以，足本既、正宗既川菜，因為對材料同技術要求之高，會被我地班毒撚評級為 「高逹」
及後，隨住聯記川菜，特別系涼菜系香港呢個所謂「美食天堂」所向披靡，迷倒無數港燦。 一如高逹系戰場上橫掃千軍、打到渣古聞風喪膽一樣。聯邦軍既概念得到認證，一如聯記夫婦既概念得到認同。噤樣下一步就要考慮投入量產，亦即系大規模生產，以逹到利益最大化。而要投入量產，就意味住要刪減高成本低產出既高端技術、以建立流水生產線，以及減省材料以控制成本預算。所以量產化，即系高逹變GM(量產型高逹)，就意味住質量同水準既大規模下降。2007年，基於成本、材料、制程既限制，聯記夫婦終於放棄佢地既堅持。將原本由幾十樣原材料調制既醬汁縮減成幾種簡單霸道既辣汁道替。另到原先精緻、複雜、多變、另到我地神魂顛倒既正宗四川小菜，變成簡單燒灼死辣既「港式川菜」。呢次就系聯記GM 化事件。
當然，呢種山寨貨依然可以迷到唔識貨既港燦既，但系人系唔可以回頭既，正所謂曾滄海難為水。對於曾經食過高逹既我地呢班hard core fans 而言，實在無辦法接受高逹變GM既事實。所以自GM 事件之後，我地都相信除左去四川之外，好難再有機會試到高逹。
只不過，聯記既高逹雖然己經不再。不過呢套高逹術語就成為左圍內朋友既共同術語，用作品評其他正宗/山寨川菜既優劣。雖知道，香港呢個所謂「飲食天堂」既地方，依然有唔少店鋪冒川菜之名，制作出種種所謂既川菜，當然唔使講，礙於成本、技術、材料、制程既考慮，基本都系山寨課。但山寨都有高低之分架，正如 高逹既量產機GM都有高底之分架﹕由最接近原型高逹，成能較優既陸戰型高逹、EZ-8, 到指揮官用GM、特裝型GM，到雜兵散仔用GM，到連GM都不如既鐵球、61式戰車。噤岩我地呢班毒撚都明白呢個高逹家族圖譜既分別，又噤岩，味道系一樣好抽象好難形容既感官。所以當我地食到某地某店既山寨川菜時，為左向同伴傳逹該店川菜既優劣，就順利成章噤用上左唔同等級既高逹或GM黎形容，所謂既高逹評級系統就系噤黎。 當然，對我地呢班毒撚而言，系無奈噤咀嚼住D GM 川菜時，心中念念不忘既系當年將我地征服既聯記高逹川菜啦。
套用胡公子既一句說話﹕川菜，系一種信仰。 用我既睇法呢﹕川菜，系一種癮品。
所以，久違左六年，今晚，當我食到呢種曾經另我朝思幕想既味道時，我都忍唔住要大叫一聲﹕高逹!!!再次站立於大地之上!!!!!
你會笑我好柒、好ON 居，但我會話﹕子非魚，焉知魚之樂~
今晚系Billy屋企聚會燒野食，噤我又有機會玩野啦，今次整d法式鷄肝醬比大家試下。所謂既法式鷄肝醬，法文讀音系「怕飛」，系上世紀七八十年代興起既新興法國菜，作為昂貴既鵝肝醬既替代品，估唔到一出就大受歡迎。因為廉價又易整，好快就飛入尋常百姓家，成為家喻戶曉既法國小食。材料好簡單，鷄肝一份，牛油一份約400g,鷄粉小量吊味，平價威士忌200ml.全部夾埋唔使20蚊，窮撚如我，噤樣用黎搽面包可以食兩個星期，絶對系窮鬼既恩物。方法好簡單，起行個油鑊，落鷄肝爆香爆熟佢，爆時落三分一威士忌，點火，燒乾d酒提昇香味。鷄肝熟透後撈起，放落攪拌機，落牛油，鷄粉，威士忌，全部打爛佢，等冷卻成膏即可。平時住家可以用黎搽面包，party聚會時搵d碗狀淡味既rice cracker或者mini toast, 搽上去，落d爆香左既面包碎，噤就系一道好食靚仔既開胃小菜啦。濃香綿滑既質感，透住淡淡既酒香，同rice cracker 既脆口形成鮮明對比，另到層次感更為豐富，用黎送酒一流。老邪誠意推介～旁門左味者邪也～
真系往事只能回味啊.....
似乎西菜入邊，牛撞羊既玩法比我想像中更普遍，繼上次飛
