新泉

呢家叫新泉快餐，系大角嘴某棟主打做劏房既唐樓既地鋪。十幾年前，我就住呢度，日常三餐多得佢關照。所謂味道連帶住記憶。新泉之所以系我印象中占一席位，系因為佢既認真，比一般茶記都要認真，足料既飲品，鑊氣十足既炒工，十年前如是，十年後依然，難能可貴。
礙於鋪面既限制，一個曲尺型既大櫃囊括左廚房同水吧，餘下既空間僅放得落三幾張枱，十張八張櫈，因此主打做外賣。可能正因為先天既不足，要系競爭激烈既同齊之中突圍而出，留住客人既心，就唯有系質量上取勝，沖出更有味道既奶茶、檸茶，炒出更有鑊氣既炒粉麵飯。總之，一定要比同行優勝少少。之前我講過，我心目中一杯合格既涷檸茶，系要有茶味，有甜味，亦要有酸味。呢個標準，就系新泉養出黎既，以致我到左其他茶記，都會用新泉既品質作標準。而要達到呢個標準，話難唔難，話易唔易，其實就系足料、足工。要落既材料落足，要做既工序做齊。但系系呢個租金爆漲、百物騰貴、商人搏命追逐利潤既年代，堅持品質就成為逆流，難能可貴。正因為呢份堅持，另新泉系我心目中保有一席位，以致不遠由大圍返黎，帶住敬意，冒住酷暑，系街邊再點一個馬來貴刁搭一杯合格既涷檸茶，配個例湯。呢一刻，似乎唔再系一條麻甩仔進餐，而系一個虔誠既信徒進行住一項神聖既儀式。