黎自香港既手信

好，離地第一步，講下今次返去既手信：東方文華餅店既玫瑰草莓醬。據講系當今世上最出色既玫瑰果醬之一，每日由文華總廚新鮮監制，限量發售。關於佢既描述，網上有大量既食評提過，據講系你食完第一啖，就會想食第二啖、第三啖....以致到想連個樽都吞埋。
對於手信，我向來頃向選擇食物，因為都系果句，味道連帶住記憶，就好似呢樽果醬，我希望佢能夠為未到過香港既外國朋友先入為主噤建立一個香甜而又矇矓既印象-盡管對於今時今日既香港人而言，香港已經苦多於甜....
但我地唔能夠忘記歷史，香港的確曾經香過，佢曾經燦爛過、輝煌過，而「東方文華」都系呢段燦爛歷史既一部分，盡管佢更多地代表權貴們既輝煌，盡管有幾分政治不正確-「Mandarin Oriental」呢個概念正系源自馬可波羅、哥倫布以來西方人對東方矇矓既想象，充滿住東方獵奇主義既味道。
但另一方面，如果我地跳出呢個框框呢？ 試想像下，如果「Mandarin Oriental」唔系出現系1963年,而系今日，甚至往後既十年，恐怕佢就唔會叫「東方文華」，而系會譯作「曼德里恩. 奧里安圖爾」....因為系翻譯既角度黎講，1963年既香港，仲系一個翻譯人員仲未倫為技工，中國傳統文化依然比較完整噤保留，翻譯依然秉持「信，雅，達」原則既時代，所以先會有「東方文華」噤既傳神之作。奈何今時今日既香港，早己系禮失求諸野，嗚呼哀哉！
二零一四年六月二十八日，寫於禮崩樂壞既香港。