獨食樂，與人食樂，孰樂﹖ ---之，老派既皮蛋瘦肉粥

皮蛋瘦肉粥，又叫「下火」，系廣東地區最常見既粥品。坊間既粥鋪為左慳皮，一般用豬肉片或者用拾熟左既豬肉打碎佢做成所謂「肉鬆」頂上既，好處系快起貨，壞處就系豬肉又鞋又老又韌。
所以，只要有時間，我會用返老派既做法。將手瓜噤粗既豬肉連埋d 粥一齊滾佢兩個鐘，滾到心都熟透之後撈起，再用兩枝筷子或者叉，順住瘦肉既紋理將佢一絲一絲噤扯開，扯到頭髮絲噤細。再全部放番入粥度，過程最少要兩粒鐘，好考工夫同時間。但值得既，因為換黎既系整個層次既昇華﹕煲左三四粒鐘既粥又綿又滑，然後綿滑既質感之中再配上一絲絲又軟又韌既肉絲，另到層次感更加豐富，完美既配搭。
方法系一位小學同學既嫲嫲教我既，老人家系一位江獻珠式既大家閠秀，知書識禮，而且煮得一手好菜，所以我成日去佢屋企「痴」餐。老人家亦對我多有提攜，閒時會教我詩書古文，亦都會同我講佢既飲食之道，想黎亦系一段金庸武俠式既奇緣。可惜果陣細個未識貨，好多野只系一知半解，記得既唔多，只有呢個皮蛋瘦肉粥印象最深刻，需知道，噤樣既一煲粥，連煲粥連起肉絲，無三五個鐘起唔到貨，食既系一啖啖既心機同老人家對兒孫既愛護。所以偶爾仲會煲一兩次，兼懷故人。
所謂既文化，所謂既傳統，除左口耳相傳既記錄，仲有既就系我地自身既堅持，既然方法傳到比我，我就有責任將佢保留、記錄，並且傳揚開去，所以每次煲好，我都會邀請幾位朋友試食，同佢地講解當中既秘決同典故，當為盡我既一份心意啦。