再談老派生滾粥﹕

講堅富記出名，但佢生滾粥我系第一次試既，實在太有驚喜，所以有幾點我必需要記低比朋友們知道既，因為，呢D傳統己經系幾近要失傳既啦。
首先，系粥面既一撮蔥花加幾絲薑絲，系老派粥品既傳統上枱規距，一方面添色，另一方面添香，將味道提昇到另一個增次。
然後，粥底系綿滑而清甜，好肯定佢唔系用豬骨煲既，而家D粥底或者湯面底中意用豬骨煲，並且吹到神乎其神，其實系新派野，厄鬼既。豬骨湯底系又濃又俗，太HEAVY絶對唔適宜用做早餐。而傳統上，廣東人既粥系早餐食既，即系鄉下人講既早粥，所以味道要鮮甜輕盈，所以系中意用河蝦、大地魚之類既河鮮煲既。而呢D 河鮮材料系昔日既廣東系唾手可得既。
最後，系一個靚既腰潤粥，系要果碗粥既溫度降至適宜入口時，D腰潤系依然爽脆既，即系僅僅熟既。即系個師傳要計算埋，腰潤落粥後到入口後果段時間既火候分寸，計算失準既話，一系腰潤過分受熱而又老又鞋，一系就未熟而食壞人。呢個火候既把握系非常考個師傳既經驗同功夫既，而家大部分既粥店都怕事，所以都頃向將D野煮熟D。所以夠薑滾到爽脆腰潤既師傳絶對系藝高人膽大，香港無剩番幾多間啦，噤耐以黎我就試到過兩間，一間系何民田愛民邨，一間就系富記，所以不可不記，亦都不可不試。